කාර්යාල නිළධාරින්

භූ විෂමතාවය හා ජල වහනය...

භූ විෂමතා කලාප අනුව පස්සර ප්‍රාදේශීය ලේකම් කොට්ඨාසය මධ්‍යම කඳුකරයේ නැගෙනහිර බෑවුමේ පිහිටා ඇත. ප්‍රධාන වශයෙන් කඳුරට වියලි කලාපයට අයත් ප්‍රදේශයක් වුවත් මීටර් 469-1230 මීටර් සාමාන්‍ය උන්නතාංශයකින් යුක්ත වීමත් ඒ අතරතුර මීටර් 1538 දක්වා උපරීම උසක් දක්වා නිරිතදිග සීමාවෙන් දකුණට හා බ‍ටහිර‍ට විහිදී යන මීටර් 1384 උසකින් යුත් මඩොල්සිම කඳු පන්තිය හා ප්‍රදේශය ආශ්‍රිතව ඇති උස් බිම් ආශ්‍රිතව නිර්මාණය වී ඇති ගැඹුරු හැඩැති නිම්න නිසා විශේෂිත වූ භූමි විෂමතාවයකින් ප්‍රාදේශීය ලේකම් කොට්ඨාසය නිර්මාණය වී තිබේ. එමෙන්ම වයඹ දිග සීමාව ආසන්න වන විට ප්‍රදේශයේ අවම උස දක්නට හැකි වේ.

ජල වහන රටාව ප්‍රධාන ගංගා ධාරා දෙකක දිය බෙත්ම අනුව දැක්විය හැකිය. ප්‍රදේශයේ අභ්‍යාන්තරයේදී විවිධ දිශාවන්ගෙන් ඒකරාශි වන අතු ගංගා වලින් පෝෂණය වන ලොග්ගල්ලා ඔය ප්‍රදේශයේ වයඹ සීමාවෙන් පිට වී යාමක් දැකිය හැකිය. දකුණු සීමාවෙන් විහිදෙන මැණික් ගඟ ඉහළ පෝෂක ප්‍රදේශයේ අතු ගංගාවන්ගෙන් සමන්විත වේ.

ප්‍රධාන වශයෙන් මානව පරිභෝජනය හැරුණු විට හෙක්ටයාර 1507 ක් වන වී වගාව සඳහා ජලය ප්‍රයෝජනයට ගැනීම අතු ගංගා ආශ්‍රිතව ඇති රැලි බිම් යොදාගෙන ඇති බව දැකිය හැකිය. මහ පරිමාන ජල යෝජනා දැකිය නොහැකි අතර අතු ගංගා හරස් කර ඉදි කරනු ලබන කුඩා අමුණු ආශ්‍රිතව කුඩා ඇළ මාර්ග ආශ්‍රයෙන් වගාවන්ට ජලය සපයා ගනී. සමස්ථයක් වශයෙන් වාර්ෂිකව මිලිමීටර් 2441.43 වර්ෂාපතනයක් ලැබීමත් ප්‍රාදේශීය ලේකම් කොට්ඨාසය පුරා ව්‍යාප්තව ඇති පෝෂක ප්‍රදේශයක් නිසාත් ජල සම්පත බහුලව පවතින බවක් දැකිය හැකිය.

පාංශු කලාප...

පස්සර ප්‍රාදේශීය ලේකම් කොට්ඨාසයේ පාංශු කලාපයන්ගේ ව්‍යාප්තිය අනුව සමස්ත ප්‍රදේශයෙන් 99.8% ප්‍රදේශයක ව්‍යාප්තව පවතින්නේ රතු කහ පොඩිසොලින් සහ කඳුකර රෙගසොලික් පාංශු කලාපය වේ.

මහා මාර්ග පිළිබඳ විස්තර

ප්‍රාදේශීය ලේකම් කොට්ඨාසයේ පාරවල් නඩත්තු කිරීම හා අළුතින් පාරවල් ඉදි කිරීම මහා මාර්ග දෙපාර්තමේන්තුව 1982 දක්වා සිදුකළ අතර 1998-1999 දක්වා මාර්ග සංවර්ධන අධිකාරිය විසින් කොන්ත්‍රාත් පදනම මත මාර්ග ඉදි කිරීම් හා නඩත්තු කිරීම කරන ලදි.මෙම කටයුතු වලින් කොටසක් 1990 සිට ඌව පළාත් සභාව යටතව පැවරි ඇත.

ප්‍රදේශයේ මාර්ග සිතියම් අනුව පස්සර නගරය කේන්ද්‍ර ස්ථානය කොට ප්‍රධාන මාර්ගවල ව්‍යාප්තියක් හඳුනා ගත හැකි අතර එම මාර්ග වලින් විශාල ප්‍රමාණයක් පස්සර ප්‍රාදේශීය ලේකම් කොට්ඨාසයේ දකුණු අර්ධය තුළ ව්‍යාප්ත වී තිබේ.

“A” ,“B”, ,“C”, සහ“D” ශ්‍රේණියේ මාර්ග

1) පස්සර බිබිල මඩකලපුව මාර්ග -A මාර්ගය
2) පස්සර බඩල්කුඹුර මාර්ගය -A මාර්ගය
3) පස්සර නමුණුකුල මාර්ග - B මාර්ගය
4) පස්සර මඩොල්සිම මාර්ගය - B මාර්ගය
5) පස්සර මැදවෙලගම මාර්ගය - C මාර්ගය
6) පස්සර මඩුගස්තලාව මාර්ගය - C මාර්ගය
7) පස්සර මිරියබැද්ද මාර්ගය - C මාර්ගය
8) පස්සර බුත්තල මාර්ගය - C මාර්ගය
9) බදුල්ල පාලාවත්ත මාර්ගය - C මාර්ගය
10) බිබිලේගම නමුණුකුල මාර්ගය - C මාර්ගය
11) අම්බලම බිබිලේගම මාර්ගය - C මාර්ගය
12) වැල්ගොල්ල 7 කණුව මාර්ගය - C මාර්ගය
13) පස්සර සපුරොද මාර්ගය - D මාර්ගය
14) ගෝනගල පස්සර මාර්ගය - D මාර්ගය
15) හිඟුර හන්දිය ඉඩම්ගෙදර මාර්ගය - D මාර්ගය
16) කොටුගහතැන්න ඉඩම්ගෙදර මාර්ගය -D මාර්ගය
17) පරපාව මාවුස්සාගොල්ල මාර්ගය - D මාර්ගය
18) පස්සර මාලිගාතැන්න මාර්ගය - D මාර්ගය

ප්‍රදේශයේ ඇති මාර්ග වලින් වැඩි ප්‍රමාණයක් මෙම ප්‍රධාන මාර්ගයන් හා සම්බන්ධවෙයි. පස්සර ප්‍රාදේශීය ලේකම් කොට්ඨාසයේ උතුරු අර්ධය කිසිදු ප්‍රධාන මාර්ගයක විහිදීම දක්නට නොලැබිම එම කොටස් හී අඩු මාර්ග ඝනත්වයට හේතුවක් වී තිබේ.

කහටරුප්ප, පාලාවත්ත, දඹකො‍ටේ. මඩුගස්තලාව වැනි ග්‍රාම නිලධාරි වසමේ කිසිදු ප්‍රධාන මාර්ගයකින් ආවරණය නොවේ.